Posts Tagged ‘තඩි ගෑණු’

දැල්වී අවසාන වූ දුම් වැටියේ අවසන් උගුරත් ඇද එය විසි කර දමා මාලක නැවත ඔෆීසියට ගියේය.

අහම්බෙන් මෙන් තමන් අතින් එදා සිදුවූ සිදුවීම මාලකට එම ගණිකාවගේ පහස සොයා නැවත නැවතත් යාමට තරම් ප්‍රබල විය.ප්‍රථම දිනවල තිබූ අපුල දැන් මාලකගේ හිතෙන් පහව ගොස් ඇත.එමෙන්ම අනූපමාට තමන් කරන්නේ ද්‍රෝහී ක්‍රියාවක් බව මාලකට දැන් නොසිතෙන තරම්ය.

මාසේ අන්තිම සතියේ හම්බෙන පඩි පැකට් එක ගත් මාලක කිලිටි හම්බෑගය උරේ රඳවාගත්තේය.මාලකගේ පරමාර්ථය අන් සැවොටම හොරෙන් අදත් ගණිකාවගේ පහස විඳීමටය.

මහත ගෑණුන්ගේ අපුල ගන්ධය අප්‍රියකරන මාලකට කෙසඟ ගණිකාවගේ දහදියෙන් තෙමී තිබූ සිසුර පවා අපුලක් නොවූ හැටි.

අඳුරු කුණු කානුව දිගේ පාරට පැමිණි මාලක එකවරම ගල්ගැසුනේ ඔෆීසියේ රම්‍යාබස් නැවතුමේ සිට තමන් දෙස බැලීමත් සමඟය.මාලකගේ සිරුර දහදියෙන් තෙත් වීමට වැඩි වේලාවක් ගත වූයේ නැත.

ක්ෂනිකව සාක්කුවට යැවුනු අතින් ලේන්සුව ඩැහැගත් මාලක නළල පිස දැමූයෙන් ලේන්සුව තෙත බරිත විය.

ආ මාලක..මොකෝ මෙතන කරන්නේ.

මේ මේ මෙතන ඉන්නව මගේ නෑදෑ වෙන කෙනෙක් එතනට ගියා.

රම්‍යා කට ඇඳකර පැත්තකින් පොඩි සිනහවක් දැමීය..

ආ එහෙමද හොඳයි හොඳයි..

ජීවිතේ තරුණ සමයේ සිටම අවාසනාව කර පින්නාගෙන ආ මාලකගේ කරමත දෛවයෙන් තවත් සිනහවක් පහල වූයේ ඒ අයුරින්ය.

සුලං හමන වේගයෙන් මාලක සම්බන්ධ සිදුවීම ඔෆීසිය පුරා හමාගෙන යන්නට වූයේ පසුදින රාජකාරි ආරම්භ වීමටත් පෙර සිටමය.

අද්ද අද්දා කොර ගසන මාලකගේ කකුලට වාරුවක් වීමට නොසිටි මිනිසුන් ඔහුට දෙස් දෙවොල් තබන්නට වූයේ තමන්තුළ සැගවී තිබූ රහස් සගවන්නට මෙනි.

මේකගෙ කකුල අබ්බගාත වෙලා මෙහෙමනම් හොඳට තිබ්බනම් මොනා නොකරයිද?අපෝ මෙහෙව් උන් එක්ක ඔෆීසිවල ඉන්නත් බයයි.
පිරිමින් කිහිප දෙනෙක් අතින් අතට හුවමාරු කරන සුන්දරි මාලිනී පවා පැවසුවාය.තම තමන්ගේ වැරදි සේරමමාලකගේ හිස මත පැටවූ ඒ දින කීපය තුළ ඔෆීසියේ තිබුනේ පුදුමාකාර සතුටක් හා නිහඬ බවක්ය.

මාලකට දරා ගත නොහැකි වූයේද නිහඩ බවයි.සියලු දෙනාගේම ඇස් අගින් නැගෙන හොර බැල්ම හා දත් නොපෙන්වා කට කොනින් කෙරෙන හිනාව මාලකගේ හිත හිරිවට්ටයි.

මුන් ඉන්ට ඕනි ගෑණු එක්ක ඉන්නවා මම මට කැමති ගෑණියෙක් එක්ක හිටියම මුන්ට තියෙන රුදාව මොකක්ද

හිතුනත් පිටනොකෙරන එකී මෙකී සිතුවිලි රාශියක් මාලකගේ සිත තුළ ඉපිද සිත තුළම භූමදානය විය.

ලෝකය ගැනම කළකිරුනු මාලක එදා වේලාසනින්ම ගණිකාවගේ පහස විදීමට ගියේය.දැන් හැමෝම දන්නවා මට තව වෙන්න පුළුවන් දේ මොකක්ද මාලකට සිතුනේය.

ජීවිතයේ සතුටක් ලැබූ පැයක්පමණ කාලයකට පසු මාලක කුණුකාණුව දිගේ මහ පාරට පිවිසියේ ගණිකාවත් සමඟමය.

ඈ බොල මිනිහො තෝ එතකොට මේකයි කරන්නේ..

ඇසුනු ගෝරනාඩුවෙන් තුෂ්නිම්භූත වුනු මාලකගේ කටේ කෙළ හිඳුනේ රවාගෙන තමා දෙස බලා සිටි අනූපමාදැකීමෙන්ය.

මාලකගේ ජීවිතය ගැන පුදුමාකාර කැක්කුමක් තිබූ ඔෆීසියේ මිතුරෝ මාලකගෙ කඩා වැටෙන පවුල් ජීවිතය නඟාසිටුවන්නට පුදුමාකාර වෙහෙසක් ගෙන තිබුනි.

කාලකණ්ණි මාලකගේ කටින් ගිලිහිය.

මෙහෙ වර පරට්ටි.

තඩි අනූපමා කෙසඟ ගණිකාවගේ ඉළ ඇට බිදින්නට මෙන් පහර පිට පහර දෙන්නට විය.වේදනාවෙන් කෑමොර නැඟූ ගණිකාව අමු තිත්ත කුණුහරුපයෙන් බැන වදිමින් දිව යන්නට විය.

අනූපමාගේ තඩි අතින් කණ පුරා ගිය පහර වේදනාවෙන් රිදුම් දෙන්නට විය.

මාලකව පසෙකට තල්ලු කර දැමූ අනූපමා යන්නට ගිය ලෙසින්ම ප්‍රේක්ෂක ජනතාවද විසිර යන්නට විය.බිමඇඳ වැටුනු මාලකගේ කකුල වේදනාවෙන් පුපුරු ගසන්නට විය.

රිදුම් දෙන කකුලත් ඇඳ ඇඳම මාලක බසයකට නැඟුනේ හිස් සීට් එකක් දුටු නිසාවෙනි.

පෑලියගොඩ බහින්ඩ පෑලියගොඩ බහින්ඩ

කොන්දොස්තරගේ කට හඩින් අවදි වූ මාලක බසයෙන් බැස්සේ තමන් වැරදි බසයකට ගොඩවී තිබූ බව පසක් වීමෙනි.

අරමුණක් නැතිව හිත දරාගත නොහැකි වේදනාවක් පොදි ගසන් රිදුම් දෙන කකුල අද්දමින් මාලක කැළණිපාලම මතට පිවිසියේය.පාලමෙන් පහල දිය කද දෙස ආසාවෙන් එබී බැලූ මාලකගේ හිතේ ක්ෂණිකව කලු රේඛාවක් පහල විය.

හම් බෑගය පසෙකින් තැබූ මාලක පාළමෙ ගැටිය මතින් ආකශයට විසිවුනේ තමන්ට ආරාධනා කෙරූ මහා ජල කඳ වැලද ගැනීමටය.

ජලකඳ තුළ මාලකගේ නොපෙනී යාමට පෙර ඔහුගේ මුවින් එකම එක වදනක් වා තලයට මුසු විය.

තඩි ගෑණු.

ඉන් පසු එළඹි දින කිහිපය තුළම මාලක ගණිකාව මුන නොගැසීමට තීරණය කර තිබූ හෙයින් සුපුරුදු බස් නැවතුමට සමු දීමට තීරණය කලේය.

ඒතනින් පසුව එළඹියේ මාලක කවදාවත් නොසිතූ ආකාරයේ මහා මානසික පෙරලියකි.

වේදනාවක් නොමැති වුවද කොර ගසමින් ගමන් කරන කකුල මහා අප්‍රාණික ගතියක් ගෙන දෙන්නට වුනි.ඇගපත තලා දැමුවාක් මෙන් විය.නිරන්තරයෙන්ම හිතට දුක් මුසු කනස්සල්ලක් දැනෙන්නට විය.

මේ ජීවිත රටාව වෙනස් විය යුතු බව මාලක තීරණය කරේ සිතත් එක්ක පොර බැදූ පැය ගණනකට පසුවය.

තාමත් මාලකගේ හදවතේ කොනක දැවටී තිබූ ගණිකාවගේ බුලත් කහට පිරුණු මුව මාලකගේ මොළයේ දඟ කරන්නට වූයේ පෙණ නගිමින් ඇවිස්සෙන දිය සීරාවක් සේය.

ගණිකාවගේ මාලක දුටු විශේෂත්වය අන් කිසිවක් නොව අධික කෙසඟ බවය.ඔබත් මාත් පිලිකුලෙන් කෙළ ගසන්නට පවා පෙලබෙන තරමක වූ කෙසඟ බවය.

නමුත් මාලකගේ හිතේ ආසාවන්වල ලැඟුම් ගෙන සිටියේත් කෙසඟ ගෑණුය.

හවහට යනව අද ඒ පැත්තෙන්…මාලක තමන්ටම කොඳුරා ගත්තේය.හදිසියේම යමක් සිහිවී මෙන් වට පිට බැලුයේ තමන්ගේ සිතුවුලි වෙන කෙනෙක්ගේ අවධානය දිනා ගෙන ඇත්දැයි සැක හැර දැනගැනීමටය.

නැති වැඩ මවාගත් මාලක එදා ඔෆීසියේ අඳුර වැටෙනකන්ම රාජකාරී කරේ හිතේ පහල වූ පාපකාරි සිතුවිල්ලට පව් ගෙවීමක් ලෙස සිතමිනි.

රත්වී උඩ පනින වතුර භාජනයක මතුවී පිපිරෙන දිය බුබුලු මෙන් මාලකගේ හදවත ගැහෙන්නට විය.ජීවිතයේ කවදාවත් නොසිතූ දෛවෝපගත ගමනකට මුල පුරන්නට මාලක ඔෆීසියෙන් එළියට බැස කොර ගසමින් වටපිට බලමින් මාලක ගණිකාව සිටින ඉසව්වට පැද්දි පැද්දී ගමන් කරේය.

ආ මහත්තයා මේ දැන් මට්ටක්කුලියෙ බස් එක ගියා විතරයි..

ආ එහෙමද?අද ටිකක් රෑ වුනා..මාලකගේ හදවතේ ගිඩි ගිඩිය ඔහුගේම දෙසවන රැව් දෙන්නට විය.

මහත්තයාට මොකක්ද තියෙන ප්‍රශ්නෙ.ගණිකාව විමසුවාය.

නෑ මට ඇති ප්‍රශ්නයක් නෑ.

එවෙලේ ගණිකාවගේ බොල් දත් පෙන්නා පෑ හිනාවට මාලකගේ කොඳු නාරටිය දිගේ සිහින් සීතල වෙව්ලීමක් දිව ගියේය.

ඇඳුම් ඇදන් තමන් ලෝකයා ඉදිරියේ නිර්වස්ත්‍ර වූ බව මාලකට හැගුනි.

මිනිස්සු සිය ගාණක් එක්ක බුදියගත්ත මට පිරිමි කියන්නෙ තේරුම් ගන්න බැරි අමුතු සත්තු ජාතියක් නෙවී මහත්තයා.

ගාණ කීයද? මාලකගේ හඩේ වූයේ හැඩුම්බර වූ මද වෙව්ලීමකි..

දන්න අදුරන හින්දා 800ක් දෙන්න මහත්තයා.වෙන එවුන්ටනම් මම මේ ගානට විකිනෙන් නෑ..

මිනිස් පුළුටක් නොබලන තරමට කෙසඟ වු ගණිකාව තමන්ගේ පම්පෝරිය මාලකට විදහා දැක්වූවාය.

හපෝ වැඩී 500ක් දෙන්නම්.

එහෙව් ගානට කොහෙද මහත්තයා ගෑණු රෙද්ද උස්සන්නෙ.600ක් දෙන්න.

හා කොහාටද යන්නෙ..

ආයෙ කොහාටවත් යන්න දෙයක් නෑ.මහත්තයා එන්න මගෙ පස්සෙන්

ඇය මාලකව රැගෙන ගියේ එතනින් තිබූ පටු කුණු කානුව දිගේ ගොස් පමනක් පිවිසිය හැකි ගුබ්බෑයමකටය..

දොරක් යැයි පැවසිය හැකි දිරා ගිය දිය සීරාවට පුස් බැදුනු ලීයක් උලුවස්සට අඩවල් කර ඈ චීත්තය උනා දමා කාමරය කොනක තිබූ පැදුරක් දමා තිබී ලෑලි කීපයක උඩුබැල්ලෙන් ඇද වැටුනි.

මාලකගේ හිත මහා අපුලකින් පිරී ගියේය.ගලාගෙන යන දිය සීරාව හා පුස් බැදුනු ලෑලිවල ගඳ නාස් පුඩු පුරා විහිද ගොස් තිබුනි.

තමා මේ සිද්ද කරන්නට යන්නේ මොන තරම් වූ අපුල ක්‍රියාවක්දැයි මාලකට පසක් වුනි.මේ තමන් අනූපමාට ද්‍රෝහී වීමක් නොවේදෝ යන සිතුවිල්ල මාලකගේ හදවතට වද දෙන්නට විය.

මහත්තයා කරන දෙයක් ඉක්මනට කරන්න.තාම බිස්නස් පටන් ගත්තා විතරයි..

ඒ අපුල ස්වරයෙන් මාලකගේ සිතුවුලි දෑන බිදී ගියේය.

නෑ මට ඕනි කථාකරන්න විතරයි ටිකක්..

මොන රෙද්දක්ද ඒ ඇය පැවසුයේ උනා දමා තිබී චීත්තය ඇඟ දවටාගනිමිනි..

වෙන රස්තියාදුකාරයෝ ඇවිත් මහත්තුරු වගේ ගාන දීල වැඩේකරල යනවා.තමුසෙලා මහත්තුරු කියන් ඇවිත් සමහර මාධ්‍යකාරයෝ වගේ අපේ හිත් දැනන් ගිහින් ලෝකෙටම නිරුවත් කොරනවා.රස්තියාදුකාරයෝ නම්බුයි මහත්තයා තමුන්ලට වඩා උන් අපිව නිර්වස්ත්‍ර කරන්නෙ උන් ඉස්සරහ විතරයි ලෝකෙම ඉස්සරහ නෙවේ.

මාලකගේ හිතේ පැල්මක් ඇතිවූයේ ඒ සැනින්මය.

බාගෙට දවටාගත් චීත්තය ඈ අතින් ගිලිහී කාමරයේ එබී තිබූ සැදෑ ආලෝකයෙන් කෙසඟ වත දැකි මාලකට ඉන්පසු ඉතුරු වූයේ දහදියෙන් පෙගී ගිය සිරුරකි.


ප/ලි : තව එකම එක කෑල්ලක් තියේ.අප්සට් ගන්නෙපා හොඳේ..ඒක හෙට බලමු.

දාඩිය පෙරාගෙන ඔෆීසියට පැමිනි මාලකට දැනුනේ මහත් ඔක්කාරයකි.බස් එකේ තමන් ළග කිටි කිටියේ තෙරපි තෙරපි පැමිණි කළු මහත ගෑණිගේ දහඩිය ගඳ තාමත් නාස් පුඩු අඟින් දැනෙනවා වැනිය.කප්පරක් වැඩ මේසය මත ගොඩ ගැසී තිබුනද ආ සැනින්ම කැන්ටිමේ මුල්ලේ තිබුන දුර්වර්ණ ටැප් එකෙන් මූණ හෝදාගත්තේ ඒ නිසාය.ඒත් තවමත් දහදිය සමග මුසුව තිබූ අපුල ගඳ පහව ගොස් නැත.

කුෂන් පුටුවේ දිගෑදුනු මාලකගේ මතකය කෙමෙන් අතීතයට දිව ගියේය.

තමන්ට මහත ගෑණු මේතරම් අපුල වීමට හේතුව අවුරුදු කිහිපයකට ඉහතදී කැන්දන් ඒමට සිදුවූ භාර්යාව බව සිහියට නැගුනු මාලකට තමන් ගැනම ඇතුවුනේ මහත් වේදනාත්මක කළකිරීමකි.

තමන් කෙලිලොල් වියේදී ගත කළ ඒ සුන්දර නිදහස් ජීවිතයට කණකොකා හඩවපු අනතුර තාමත් මාලකගේ සිත තුළ දරුණු වේදනාත්මක වෛරයක් පමනක් ඉතුරු කර ඇත.

අපරීක්ෂාකාරී බස් රියදුරකුගේ පාපයකට තමන්ට ගොදුරු වීමට සිදුවූ නිසා ජීවිත කාලයකටම තමන්ගේ කකුලේ ඇතිවුන කොරය මෙතරම් පසුපසට තමන්ගේ ජීවිතය තල්ලුකර දැමීම මාලකගේ දෛවයේ සරදමක් වැනිය.

මඟුල් තුලාවක් හොයා අවුරුදු ගානක් දැගලුවද තමන්ගේ හිත ගත් කෙසඟ සුන්දරියන් එකෙකුගේවත් කැමැත්ත මාලකට නොලැබුනේ කකුලේ වු අබ්බගාතය නිසාවෙනි.

අවසානයේ තමන්ට කැමති වූයේ වෙන මිනිහෙක් සමගඩ් දීග දීමට බැරි තත්වයේ කඳ බඩ මහත කළු ගෑනියෙක් වූ අනූපමාය.

ඒකත් හිත හදාගෙන ඉන්න පුලුවනි.ඒත් මේකිගේ චරිතෙවත් හොඳනම්.මංගල රෑ තමන්ට අනූපමාගෙන් නොලැබුන ඒ ලේපැල්ලම මාලකගේ හිත අපායක් තරමටම කිළිටි කරන්නට සමත් විය.

දැනුන කේන්තිය පිට කිරීමට අතේ කිටි කිටියේ මිරිකුන පෑනින් කොලයක බලියක් ඇඳුනේ මාලකගේ ඇස අද්දරට කඳුලක් නංවමිනි.

මේතරම් වේදනාවක් කාර්යාලය තුළ පිට කීරිමට නොහැකි නිසා පිටි අල්ලෙන් කඳුල පිසදැමූ මාලක මහත් හඬකින් සුසුමක් පිටකරේ දෝරේ ගලන වේදනාව පිටාර ගැලීමටය.

පුටුව පසැකට කර නැඟිටි මාලකගේ ඊළග නැවතුම වූයේ කැන්ටිම අසල තිබූ අරලියා ගස යටයි.මිලදී ගත් සිගරැට්ටුවේ එක හුස්මක් ඇද ගත් මාලක දුම් කැරැල්ලක් පිට කරේ බිම බලාගෙනමය.

මොකක්ද ඒ

බිම තිබූ බුලත් කෙල පැල්ලම මාලකව ජීවිතේ තවත් ඉසව්වකට ගෙනගියේ නිරායාසයෙන්මයි.

රාජකාරිය නිමාවී බසයට දුව යන අතරමග දක්නට ලැබුනු ඒ කෙසග ගණිකාව මාලකගේ දින චර්යාවේ සුපුරුදු අංගයකි.

අවුරුදු ගානක් දුටුවද ඒ පිලිබඳ තැකීමක් නොකල මාලකගේ සිත හදිසියේම වෙනස් වූයේ පුදුමාකර ලෙසටය.

වෙහෙසකර මෙන්ම අපුල විවාහ ජීවිතයෙන් කළකිරී තිබූ මාලකගේ හිත රාජකාරියෙන් පස් නිවෙස බලා යාමට ප්‍රතිරෝදයක් ඇති කර තිබුනේ මාලකටත් නොදැනීමය

හදිසියේ ඇතිවූ මහ වැස්සෙන් බේරීමට එදින මාලකට පිහිට පතන්නට වුයේ කෙසඟ ගණිකාවගේ රාජකාරී ස්ථානය අසලය.

බුලත් කෙල දැවටිනු දුර්වර්ණ බොල්ලෑ දත් විහිදා “මහත්තයාට අද බස් එක අල්ලගන්න බැරිවුනා නේද” කියා ගණිකාව පැවසුවාය.

“ඔව්.මේ වැස්ස.”


මාලකට කියවුනේ ඉබේටම මෙනි.අත් නැති හැට්ටයක් ඇද සිටි ඈ ඔලුව කසන්නට අත එසවුන දෙස නිරායාසයෙන්ම බැලුනු මාලකට කිහිල්ල වසා තිබූ මවිල් දැක කුමක්දෝ හැඟීමක් හිත තුළ තෙරපෙන්නට විය.

“කොහෙටෙයි මහත්තයා යන්නෙ”

“මට්ටක්කුලියට”

“අදනම් බිස්නස් නෑ මහත්තයා.”

“හ්ම්ම්ම්..”

එවිටම පැමිණි බසයට මාලක ගොඩවිය.


ප/ලි:හෙට එන්න අනිත් කෑල්ල කියවන්න.හිතුන දෙයක් තියේනම් පහලින් කියලා යන්න.ඒක මේ කෙටි කථා එකතුවට රුකුලක් වේවි.